إلّي خلاّني ننتقل، أو ننظّمّ إلى كتلة حركة النّهضة رغم إلّي أنا مترشّح على حركة الدّيمقراطيّين الاشتراكيّين. أوّل حاجة حركة الدّيمقراطيّين الاشتراكيين في توصيفها هي حركة معتدلة، حركة فيها الحساسيّات الكلّ وتجمعها أهداف نبيلة، و الاشتراكيّة في حركة الديمقراطيين الاشتراكيين هي بمعنى العدالة الاجتماعية، موش بمعنى الاشتراكية بمفهومها الضّيق أو المتداول أو المعروف، هذا من ناحية، من ناحية أخرى، أوّل ما دخلت للمجلس، حزبنا ما ينجّمش يكوّن كتلة، لأنّه زوز مالنّاس فقط، أنا انظمّيت في وقتها إلى كتلة مستقلّة، تقريبا أغلب أعضاءها مستقلّين، هي كتلة الحرّية و الكرامة، و صار أنّه الكتلة هذه تحلّت بعد مدّة نظرا لبعض الخلافات و عدم الانسجام بين اعضاءها. بقيت على ذلك النّحو، و بقيت تقريبا نحاول نكتشف الكتل الموجودة هنا، حضرت مع بعض الكتل، حضرت حتّى مع كتلة حركة النّهضة، و اقتنعت في الأخير أنّه، حسب ما ريت في وقتها، ثمّة في داخلهم نوع، ليس من الاسقاط كما يقال او أنّهم ياخذو القرارات بمجرّد أوامر فوقيّة لا كان فمّا des débats، كان فمّا نقاش و حوار بكلّ صراحة و مرّات يلتجؤو للتّصويت. هذا تقديري أنا، تقدير ينجّم يكون تقدير وّفقت فيه إلى درجة ما، و نجّم حتّى نراجع التّقدير متاعي في يوم من الأيّام، التّقدير مربوط بالسّياق الزّماني و المكاني و ما يمكن أنّه يفعل فيك حتّى تأخذ قرار، خاصّة على المستوى النّفسي و غيره. تقريبا هذا إلّي خلاّني ندخل لكتلة حركة النّهضة، مش حزب حركة النّهضة، الحمد لله أنا ما دخلتش في سياحة حزبّية، هذه كتلة، و نجّم في أيّ وقت نخرج منها الكتلة هذه، ماهوش أمر نهائي، متى رأيت أنّه وجودي في الكتلة هذه و الاختيار متاعي ما كانش موفّق نخرج منها.

الأسباب موضوعيّة، أرى أنّ الأستاذة يمكن أن تكون قصّرت و يمكن أن تكون اجتهدت، والذّي حصل هو عمل سياسي بامتياز، أراد النّواب محاسبتها على مواقفها السّياسيّة، الوزيرة مناضلة و لها مواقف وطنيّة، و أرى أن اعطاءها فرصة لمواصلة عملها في الوزارة، بحكم أنّها أدرى بها، أحسن من أن نسحب الثّقة منها.